Sans oeillères ni coton

Ingénieur Anil
— Eta Ti-Louis, ki position mo frère? Ala pas bon samedi dernier-là! Mauvais qualité noyer sa.
— Mo frère sape dans la mort. Pas causé, sa qualité là. De mémoire de turfiste du jamais vu sa quantité délo dans Champ de Mars.
— Ene vrai piscine, heureusement ki Sheriff fine décide pour arrête après 2e sinon pa conné ki ti capave arrivée.
— Dans Caudan fine ena le tunnel de la mort, ici ti pour ena le bassin de la mort.
—  Mais dire moi Ti-Louis, d’après l’ordre fine l’heure pour faire des travaux dans Champ de Mars avec sa qualité inondation-là! Sirtou si ces Messieurs ne sont pas pressés de partir. Zot encore pé laguerre entre Pierrefonds et Mapou.
— Travaux? Pas cause sa avec moi to fer moi gagne peur.
— Ti-Louis ki fer to gagne peur? Bizin pour le bien-être des turfistes, li pas possible qui ti éna ki ti pé nager alors que lécourse pé déroulé!
— Oui mo d’accord avec toi ki bizin pas laisse sa situation la pareil, surtout avec la météo qui pas koné ki li dire et sa ban Flash Flood qui vine ene seul coup la.
— Ti-Louis to fer moi gagne ene flash ene seul coup. Mais manière mo trouvé bizin guette Anil Colas pour fer ingénieur des travaux. Li ene spécialiste dans canalise délo la pluie. To pas fine trouvé ki li fine fer lor l’autoroute M1. Top pas top?.
— Li avec Sheriff zot dans même Loge sa. Sirement li capave cause avec Anil Colas. Mais surtout Sheriff bizin dire li pas blié mettre ban parapets lors bord la piste. Koum sa ban souval la capave glissé plis bien et surtout nous pou capave konne résultat avec.
— Ti-Louis pas facile avec toi, lor la osi to rode tire profit. To kouma dire sa ban volontaires qui fine rempli zot 4×4 après zot la journée.