Zainab Soyfoo*
Mo’nn fer sime montagn mo’nn desann
dan enn vale ranpli ar fey ver ek lapay kann:
Zwazo ki lao ape bat lezel,
ti-lever anba ape fouy later:
Sakenn so model, sakenn dan so ler…
Dan pa ti atann, mo’nn zwenn ar Zoziann…
Lapo-lezo, zot tou ti kriye li ti-fam:
Li lev lipie pou get lot kote, li ti oter 3 pom,
Me fode gete kan li anlev so sapo,
So seve boukle briye kouma kouronn…
Zoziann ti’ena 6eme me pa ti’ena form 5,
Alor pou li gagn travay sa ti fer li boukou lapenn.
Toule trwazer, avan laklos sone,
Zoziann bat badia, li met dan karay,
Ti roupi, ti roupi li ramase,
So ti biznes pa ti mal.
Me parfwa kan so vant kriye,
li bizin deklar pa tande,
Parski pa toulezour ki so lamone zordi
ti ase pou li manze dimin…
So tant vakwa balanse dan so lamin,
li sonn so pos, so roupi sonn-sone…
Li ariv kot Codor li kriye,
“Misie, Donn mwa de dizef ar ou!”
Dizef pri lor li pa ti kone,
Poul pa le ponn, pa pe gagn pousin.
Li trap so kouronn, li fer so latet travay,
Si selman li ti’ena enn bout terin,
li ti’a ranpli li ar lake zwagnon, lake-lay ek ditin
ou bien kabri, vas ek pousin…
Me ki laport pou tape, kan to pos pa sone,
personn pa reponn.
Avan ki li al get pli lwin,
li fer lakaz-lakaz kot tou so vwazin.
Kot Nawsheen, li dir “Madam, si mo donn ou 2-3 pake ditin,
Ou pou kapav plant li dan ou zardin?”
Lot kote kot Dewrani li dir “Si mo donn ou 2-3 pie pima,
Ou pou kapav les li pou lagrin?”
Vwazin ti de tou zar, de tou kouler,
de tou ras, de tou kiltir:
Ena travay Ébene, ena travay profeser
Ena travay lamem, apel zot antreprener.
Depi enn laport pou al lor laport,
Zoziann gagn lafors pou sem so lide antie sime.
Tou le semenn, Zoziann aprann,
li zwenn ennta ti zan, ennta ti fam,
ennta kouma li, ki’ena latet dan zetwal.
Li dekouver enn lemond ki li pa ti kone existe:
Tou kalite proze, tou kalite gro mo,
enn zafer dirab ek bann UNESCO.
Ti pwin ti pwin, li zwenn so bann ABCD,
ek li dekouver enn bann NGO…
Wi si pena poul, pa pou gagn pousin,
ek si pena terin, pa pou kapav sem lagrin
me dan sak obstak ene enn oportinite,
ek pa tou sime kann ki enn sime ferme….
Dime kan to pe pase kot montagn,
kas enn poz enn timama to atann…
Twa’si to kapav tann Zistwar Zoziann pe vwayaze
laba ant fey ver ek lapay kann…
* Text Performed for Business Mauritius for their Recognition Award Ceremony