Mo enn zanfan koltar, enn zanfan lari,
mo’nn grandi dan lane 90
pa ti’ena portab-selfi-laptop-wifi,
Zot apel nou zenerasion 3310:
Mo seve sifonn-sifone
Mo rob kraz-kraze
mo kalson las lor lerin
Mo ris-rise ar enn lamin.
Kouma ariv samdi dezer,
mo dimann mo frer,
“eyy dezer la, ki pou fer?”
li sorti deor
li kriye Bilaal, li kriye Fardeen
Bann-la signal Gassen ek Akeel,
Nou ris 2 ros pou fer poto
mo sourir Ronaldinho,
nou bat boul koumadir
noumem David Bekham,
noumem Zinedine Zidane.
Lalwa nou tou ti kone,
5 vire-10 fini,
me kan gagn fot dan kare,
bann-la pa dakor ki penalty,
Pena larbit, pena VAR,
replay ti depann lor sakenn so ti-zistwar.
Trwazer vinn katrer,
katrer vinn sinker,
enn timama legliz sonn laklos sizer,
mo frer dir mwa degaze nou ale
avan tann azann dan oparler.
Ti kamwad Bilaal ramas so boul,
nou rant lakaz lapo lipie plise,
degaze bengne met prop
pou pa gagn kriye.
Mo enn zanfan koltar, enn zanfan lari,
mo’nn grandi dan vilaz Rivier-de-Zangiy,
Pa donn mwa pitza, pasta
donn mwa bred-lanti-dal-douri,
mo sano(n)* li dan karay,
ek enn bon rougay touni.
Vant ranpli, lespri dan zwe,
mo pran mo 5 roupi
pou al tras de-trwa kanet.
Triang fini reye,
nou tou pez lizie enn kote pou vize,
ena perdi, ena gagne,
ena trap latet kan gagn kont zot bel defet.
Nou konte enn-de-trwa lor ledwa,
sa pou mwa, sa pou twa,
sa komie to dwa mwa
koumadir noumem pli gran biznesmenn.
Fier nou viktwar,
mo frer lor lasel bisiklet,
mwa mo trap gidon,
nou roule ziska nou zwenn lafin wikenn.
Sa zistwar zanfan koltar
zanfan lari,
Mo pou rakont twa plis ankor plitar,
kouma nou ti pe viv lavi.
* Melanz