Dev
Depi mo lanfans
Mo papa ti evok sa nom-la avek ladmirasion:
“Gars, enn koko sa”
Mo papa rakonte ki manier
dan gran konferans deba pou Ledikasion gratis dan siyaz me 75
Pandan ki lezot gran palto ti vini avek bel-bel dosie
Dev ti akoste mikro avek enn ti papie pou koz morso
Partaz lide reflesi abe ki manier dime kapav ete
Dev
Lingwis
Ti lev enn toufaan kan li dir Kreol Morisien ouswa Morisien enn Lang!
Enn lang apar antie ki kapav dibout lor so prop lipie san beki
Enn lang ki ena so gramer
Ena dimounn ti riye, fer boufon ek ti dir:
ki li pe koze sa Boug-la?
Me plizier deseni plitar apre sa premie lartik
ti paret dan Lagazet Lexpress an 67
Se Dev ki finn gagn rezon
Li finn permet li reve kan lezot pa ti krwar
Kreol Morisien finn standardize
Li ena so grafi larmoni,
so diksioner ek so literatir aster-la
Mem si sime-la bien bien long
mem si ena ankor pou fer avan
al zwenn lasours akot nou tou pou al bwar
mem si ena ankor bann grin disab ki bizin triye
Lang -la kontinie avanse fer so bout sime
Dev ti voltiz partou defresi
sime pou ki lezot poet, ekrivin, santer, dramatirz
kapav kontinie kree an Morisien
Dev
Politisien idealis, rever
Orater extraordiner
Enn parmi fondater MMM
Limem ki ti swazir sinbol leker-
Paan ki patta komdi gran dimounn
Dan lamal listwar ek memwar
Souvenir Dev so viktwar an septam 70 revinn lor fron
Lagazet Le Militant ti imortalize:
So koze an Angle ousi bien ki an Morisien
Ti ena bel kara ek ti fer fraka
Li ti fer mo danse lor so pale
Pou fer so panse traverse
Li pa ti ezite dan Lasanble, Tamp demokrasi
pou diboute san papie defann so lide
divan Sir Harilal Vaghjee pandan ki ena
lezot ti perdi laparol, gaga, tranble
Dev
Zanfan Goodlands
Zanfan Quartier Militaire
Zanfan Beau Bassin
Zanfan Vilaz, Zanfan Lavil
Zanfan Pei Moris, Pei ki ti koul dan so lavenn
Pei a lakel li ti apartenir depi tou fib so lekor
Zame li pa finn bliye lamazi lanfans ek lavwa Gouna so Mama
Li pann finn ousi bliye Tata Iranah so zistwar anba pie Tamarin
Se sa ki finn giji so limaziner
ek finn sarye li enn lavi antie
finn nouri so lekritir ek so ev
Dev
Ansegnan kolez Eden
Ki ti touzour ena dan pli profon so leker
Lavenir Zanfan dime
Dev
Profeser Liniversite
Ki finn sem lagrin konesans
ek ekler sime enn zenerasion zelev
Tou rekonesan
ankor rapel
so koz-koze
so pasion ek
so gran leker profonder lamer
So manier introdir Shakespeare ek lezot gran bitor lekritir
So manier transmet ti fer zot tom amoure ek langaz
Ziska ler zot evok Dev avek lamour ek respe
Dev
Tradikter
Ki finn sarye mo depi rivaz Angle
pou al rivaz Morisien
Dan so kafe pa ti ena triyaz
La Bible,
Ansien ek Nouvo Testaman,
Bhagavad Gita, Koran
Tousala li finn tradir an Morisien, nou langaz Mama
Lang ki li finn berse depi dan vant so Mama ki ti res dan Vilaz Ti Frer
Li finn permet dimounn gagn akse a tou enn liniver ki ti pou res ferme
Li finn oze ekrir an Morisien
Ziska so dernie souf dan lagazet Le Mauricien
Pandan ki lapli omaz fane
bizin pa bliye Dev so dernie ve
Otonomi alimanter asam Literasi Nimerasi
Bliye stati, nom lari
sipaki gran-gran dekorasion
Li pa bizin tousala
Pli gran omaz ki nou tou Zanfan Pei Moris
Isi ek lot kote brizan kapav ofer akot Dev so lipie
Se plante pou vinn otonom
Se kontinie lir, ekrir ek kree an Morisien
Anou marye pike pou ki lasenn anfin kase dan lespri
Pou ki Kreol Morisien anfin vinn medium lansegnman
Enn lang far dan lakel zanfan Pei Moris
aprann lir ekrir konte mazine reve ek respire
Salam Dev
Repoz anpe akot
Lipie kreater Verb
Mersi pou tou
Avek tou mo lamour,
KAVINIEN KARUPUDAYYAN