JEAN JACQUES ARJOON
Li dir ser sintir
Parski seki tiena
Me linn al dan Molnupiravir
Pou ranpli enn lot katora
Li dir ser sintir
Sink san mil pou mwa
Li zis pou makiyaz ek tintir
Leres mo bizin partaz ek gopia
Li dir ser sintir
Parski mem si mank garnitir
Eki depi lager Likrenn
Li pe fer tou kouma enn vre kapitenn
Li dir ser sintir
Parski enn bann pe deklar bay
Akoz lot bann inn al Dubai
Alor ki zot, zot pe manz dipin frir
Li dir ser sintir
Pran pasians an dot mo man atann
Parski mem tirbo ek diezel an pann
Akoz lesans pe kaye dan lasir
Li dir ser sintir
Parski so partner dan krim
Pe fer boukou bav ziska lekim
Pourtan lor finansma parti boug la sinser
Li dir ser sintir
Parski li mari sir
Ki dan senn mars
So souval pou kas demars
Li dir ser sintir
Mem si zot pe mor san manze
E ki zot pe vinn blem ziska palir
Vini nou dialoge
Li dir ser sintir
Parski kot ena kriz demokrasi
Jag, Jo ek Bobi
Pou vinn pas lapintir
Li dir ser sintir
Parski nou enn pei ki ena boukou diabet
Se pa le moman pou fer emet
Fer rezim sanz zot mizir
Li dir ser sintir
Pa rant dan lopozision so delir
Ki kontign tret nou chatwa
Ek bann poupet doukiya
Li dir ser sintir
Kontign met zot mas
Pou kasiet zot pal figir
Sinon nou fer lapolis ramas zot an mas
