DAVID PIERRETTE
Inzenier ek entreprener
Konservater, koleksioner ek restorater
Mam ekzekitif S.O.S Patrimoine en péril
Finn ena enn zenosid ki ti legal, finn derasinn zot lor zot mama later, tir zot dan zot fami, briz zot, dezimaniz zot, fer zot vinn enn marsandiz ; kolie dan likou, antrav dan pwagne, antrenn zot dan lakal bato, « lanfer dan delo ». Lespwar pou pas sa traverse-la ti bien minim.
« Akot zot pe amenn nou ? », « Ki nounn fer pou merit sa ? »…
Bato-la akoste, desann zot, debark zot, mark zot o fer, lavant komanse. Resepar zot ankor, leker gro, lame dan lizie bann kri dadieu fini. Seki reziste, fouet ti pe akonpagn zot. « Lamor ou kouraz »…
Lespwar anklave. La realite ki la. Rant lor plantasion ou lezot sekter, travay komanse, lasenn, antrav, menas, samem ki akonpagn zot. Seki inn resi sove inn vinn maron, san lasenn, zot inn vinn enn danze; lasas komanse, swa vivan swa mor.
« Liberte pena pri », bann martir, seki inn sakrifie zot, lavi revolte, reziste, sibir pou gagn liberte. Zot pann perdi lespwar. « Nou pa demann nanye me omwin rapel seki nounn pase, rann enn omaz nou memwar lesklavaz. »
Mo finn koleksionn plizir obze ek konzerv zot pandan plizir lane me ena bann obze pa kapav gard sa dan lomb ou anvoy zot dan loubli : « Li pou enn insilt à la mémoire ».
« Ni Chaînes ni maîtres », fim tourne lor nou tizil, inn fer enn linpak, inn montre « un peu » tortir ek lorer ki ti pe pase sa bann lepok-la. Mo osi finn gagn lasans kontribie dan sa fim-la. Boukou bann obze de mo koleksion inn servi pou tournaz fim: enn laklos, bann lasenn, antrav, sodron… Me enn fim pa ase pou rakonte ek dekrir tortir ki esklav ek maron inn pase.
Avek plizir lane resers, inpe partou dan Moris, mo finn gagn lasans rekiper bann instriman. Obze kinn servi pandan lepok lesklavaz, mazorite inn perdi, detrir ou resikle. Deza linformasion lor zot tretman mem bien limite ek modifie.
Malgre leta sertenn bann lobze-la, restorasion finn fini fer pou rekondisionn zot. Biensir, monn servi bann metod depok, ala forz. Ena sertenn ki ti ankor an eta, ena inn bizin rekonstrir zot, biensir inn servi bann bout orizinal kinn gagne et serten monn replik zot. Monn fer sa dan enn lespri pedagozik ek pou protez patrimwann Moris. Enn gro travay dekip serye avek bann mizeolog, bann resers, verifie maksimum linformasion teknik kinn gagne dan bann dokiman, liv, arsiv, lor bann gravir pou sa bann artefact-la.
Toulezour, monn trape ek resanti plizier lobze tortir dan mo lame ek dan mo nam, sirtou konsernan lesklavaz. Li difisil pou imazinn serten get sa bann lobze-la ou met zot dan sa lapo-la. Dimounn inn soufer akoz sa. Sak fwa mo get sa bann lobze-la, mo fer zot koze dan mo fason : lenerzi ki degaze ladan, pena mo.
Li inakseptab ki bokou pa konn listwar zot pei, zot anset, zot veki. Pa bliye zot rasinn. Li bon kone, koumsa enn bann atrosite pa repete. « Fode pa nou bliye seki finn pase ». Ena bokou inn perdi lavi pou gagn sa morso liberte-la. « Pardone ?… Me pa bliye. »
A bann esklav ek maron, mersi pou zot kouraz, lespwar, mo pa pou bliye zot. Se mo devwar, mo leritaz pou rann zot omaz.
