UMAR TIMOL
- Publicité -
enn zour kamarad kan to pou malad
parski to pou malad kouma tou imin
enn zour kan to larogans
napa pou protez twa
sa zour la zot pou bizin met disan
enn lot imin dan to lekor
eski sa zour la to pou dimande
sori dokter me sa disan la li vinn depi
ki kominote, ki kouler, ki ras sa
ou eski to pou res trankil
ek to pou remersie Bondie
ki sa disan la pou fer twa viv
ki to pou fer mo kamarad ?
eski to pou konpran sa zour la
ki disan ki koule dans to lekor
ki fer twa krwar to enn mari
li disan lezot lekor
ki to disan li disan mele, melanze
pou ki to disan viv li bizin lezot disan
eski to pou konpran kamarad ki se
dan to ‘linpirte’,
dan to batardize ki to ‘salut’ trouve
