PATRICE OFFMAN
Dan fenfon liniver galaktik, amba enn gro soley dife, enpe kouma enn ti ser planet Tatouine, ti ena enn lavil mitik perdi omilie enn gran losean disab. Zot ti akeyir kan bann eleman kosmik-la inn pare, enn gran rankont sakre akot enn selexion nam Liniver vinn zwenn pou redefini prosenn levolision Lavi. Ti apel sa : Tournwa Poker Lavi. Malgre ki li form parti enn festival grandioz, li lor envitasion e tou nam ki vini, ki li zenn, ki li vie exite pou partisip dan sa espes maha zwe poker final ki zame fini. Parski, se venker tournwa-la ki dikte so vizion pou nouvo direxion Lavi. E sik-la rekoumanse touzour gouverne par lalwa iniversel kosmos, akot lentegrite, laverite ek larmoni ki otomatikman regne.
Letan ki senn Tournwa-la pe demare, enn lonbraz nwar inn vinn vwal serenite sa ti landrwa mistik-la. Rezilta lekours, dan koulwar leternite, ti pe tann restan leko bann vie diskour obskir rezone kouma enn warning. Enteresan tande ki zot ti pe devwal akot koripsion ek koze manti ti pe touzour al kasiet. Alor, parmi tou bann VVIP ki ti la, ti ena ousi so ti ponie froder ki’nn reysi trase rantre, bann lespri malefik e aswafe pouvwar. Raliman sa lekip lafors obskir la, ti fer tou pou manipil zwe-la, kontourn lalwa, fabrik lalwa ziska mem detourn lespri gardien lalwa tou, pou ki balans tomb toultan dan zot faver. Finn explwat laper, lensekirite ek viktimizasion, aste konsians ar enn ta kantite zafer, mem vann promes labondans ek so W40 pou gres partou. An retour, enn kominote inn retrouv li andete avi, prizonie enn fidelite aveg.
Pandan ki zwe-la ti pe zwe enn sel kote, enn kou, latab devire. Lame sanz direxion net. An memtan, enn tranbleman enkrwayab leve e sakouy fondman rwayom-la. Panik abor, ar tou zot larogans, konesans, lekip ki ti pe sir al gengne, malgre zot larme lorak patante, ar so loroskop tou, nepli konpran nanie. Pourtan inn servi tou kalite nouvo dernie model trikmarday ek sirtou gro latirans labous dou depi kote obskir lafors. Pourtan. Me, kan inn ariv so ler, Lespri Lavi touzour repran so lame… E sa, ti koumans par kouraz enn ti ponie zwer ki ti oz exprim zot, ansam ar bann ki ti refiz les zot silans toufe avek tou leres ki ti ena ase lafwa anrasine dan bienveyans limanite ek zenerozite Lespri Lavi. Apre ki’nn les lame, devwar vizilans ralie ar Lafors lapriyer, inn bizen konn repran lame… Enn dekodaz ti neseser dan sa vilen dezord-la.
Sa revirman spektakiler la, inn fer ki’nn kouronn aster sa ti lekip anonim ki anfet, bann vre venker sa Tournwa-la. Lor tapi ver, enteresan obzerve ki, kan Lespri Lavi prezan, pa lame pli for ni stratezi plis entelizan ki ti determinn finalman rezilta-la. Lespri Lavi, touzour ena sirpriz. Apre sa, mirak enn ti labriz fre, anfen leve soufle dan saler limansite sa gran dezer-la. Larmoni, lekilib, Lespri Lavi inn natirelman repran so plas. Toultan. Soley, inn ler pou ki li tir so reverans, enn lot sik pe repran nesans. Enn sel kou, lourder sa vwal lobskirite la disparet. Spektak soley ki pe al kasiet li deryer lorizon, anons nou enn nouvo lepok, ki nepli pou defini par detrwa aswafe pouvwar. Me, par lentansion kolektif bann nam konekte ki’nn toultan rev anakor ar lalwa kosmos, enn lemond, enn vizion akot lagren lazistis ek laverite touzour prezan pou zanfan nou bann ti zanfan. Responsabilite. Lespwar.
Dan sa moman akot lanwit pe kontan pou pran so plas-la, enn gran selebrasion pe deroule. Tou bann zwer Tournwa Poker Lavi ki’nn gengn kouraz pou diboute, ansam ar tou leres ki ti la, pe organize e selebre dan linite ek dan lakorite. Vag revey zot vizilans inn determinan dan sovgard e protexion zot trezor – karakter sakre zot lidantite konplex avek liniversalite zot lemond inik, tou sa pou bienet bann zenerasion fitir. Tousala enn sel sa. Dan konsians zot linite global, sakenn finn retrouv so serenite enteryer pou sirmont mem bann lafors ki plis obskir. Parski aster zot kone, ki som total lafors zot lalimier kolektif, parey Lespri Lavi, ena enn pwisans tel, ki sa pou toultan amenn zot, mem lizie ferme, lor sime lalimier. Konekte vibre apresie.
Deor, lao, fane lor enn gran tapi fonse, enn ponie ti zetwal ti pe briye kouma enn larivier diaman. Lesperans. Plante dan nou memwar, touleswar, Lespri Lavi rapel nou ki, mem enn ti gout lalimier izole tousel touzour pli for ki nemport ki pli gran teneb… Ubuntu.
