Apre edision 149 Anou Koz Parol, ki ti axe lor Kour Fondasion pou Kreol Rodrige, zordi, pou nimero 150, nou pe dõnn laparol plizir profesionel ki inn gengn lokazion, kouman momem, pou swiv Kour Kreol Rodrige, dan so konpleman Administrasion ek Kominikasion. Parey kouman Kour Fondasion, sa deziem kour-la ti lanse le 26 Fevriye dernien dan Rodrig. Nou konsidere ki Rodrig inn viv enn lot gran moman dan so listwār lingwistik avek lansman sa de premyin kour (Short courses) lor Kreol Rodrige la.
Sa deziem kour-la ti destinin pou bãnn Rodrige (piblik adilt ek profesionel) dan kad selebrasion Zournin Internasional Lang Maternel (ZILM). So lobzektif ti rezwenn tem ZILM sa lanin-la, ki: “Ledikasion miltileng: enn pilie pou laprantisaz interzenerasionel” ek li fer rapel ousi inisiativ UNESCO pou sovgārd tou bãnn lang otoktõnn dan kad Deseni Internasional bãnn lang otoktõnn (2022-2032).
Li ti inportan pou bãnn lotorite dan Rodrig kontign asir promosion ek vilgarizasion KR. Atraver Kour Administrasion ek Kominikasion (ki asire pār Dr. Yannick Bosquet, Mm Christina Chan-Meetoo ek Dr. Beatrice Anotonio-Francoise), enn 50-enn profesionel inn dekouver bãnn diferan eleman ek konplexite ki enan letour itilizasion KR dan enn stil formel, ki li dan administrasion ouswa dan kominikasion.
Favoriz itilizasion nou lang maternel KR kouman premyin mwayin kominikasion dan lansegnman oubien so itilizasion dan servis piblik, li permet enn meyer konpreansion ek konsiderasion bãnn konesans ki nou lang maternel veikile.
Marie Jouana GENAVE, Ofisie Kiltir, Komision Ār ek Kiltir, RRA 
***
“Enn demārs patriotik pou konsolid nou lidantite” (Jacques Edouard, ekrivin, Vis-Prezidan Akademi Kreol Rodrige) 
Nou bizin tir sapo ek Komision Ār ek Kiltir ek Liniversite Moris pou sa kour-la. Li enn letap lozik apre piblikasion Diksioner Kreol Rodrige ek lantre KR dan lekol.
Mo avan tou enn militan kiltirel. Pou mwan, swiv sa kour-la li enn demārs patriotik ki permet mwan konsolid mo lidantite rodrige atraver mo lang maternel.
Ler mo gete zordi kot Kreol Rodrige inn arive, pou mwan se enn rev ki inn vinn realite. Enn konba depi long dat, akot nou pe rekolte so frwi. Nou kapav dir 40-an apre, li inn vinn enn realite.
Lang-la li ofisiel me ankor enan bãnn defi. Bizin konsolid li dan sosiete Rodrig e fer li aksepte. Sa kour-la li rant dan enn lozik formasion ki ti neseser. Zis difiz regleman ek konvansion Kreol Rodrige pa pou zamin ase pou fer aprãnn lang-la. Li enn plezir trouve ki depi inn lans sa kour-la, bãnn kominike ofisiel, bãnn bandrol lor bor larout demontre plis zefor pou servi grafi ofisiel.
Formasion pe diminien rezistans. Atraver formasion, mo konfian ki pou kapav konvink bãnn seki kont. Pou kapav ousi konvink bãnn piris ki pa kapav zis adopte ansien manier koze, ki enn lang oral enan so limit kan pou bizin ekrir li. Li bizin evolie e li neseser anrisi so vokabiler.
Kour lor Kreol Rodrige dan so dimansion administrasion ek kominikasion enn letap inportan pou montre ki Kreol Rodrige li enan so plas akote Angle ek Franse.
***
“Kreol Rodrige inpringnin dan nou ADN ek fer pārti integral nou ‘l’âme rodriguaise’”, (Davy Williams Perrine, Responsab Teknik, Depārtman Ār ek Kiltir, RRA) 
Kour Kreol Rodrige, dan so konpleman “Administrasion ek Kominkasion”, li enn letap esansiel pou kontign proze standārtizasion KR, prinsipalman dan bãnn institision ek pou ranforsi lotonomizasion nou lang kreol. Antan ki enn azan dan domenn kiltirel ek dan sofgārd leritaz, nou rãnn nou kont ki konesans nou langaz li enn mwayin pou veikil nou lidantite kiltirel nou zil Rodrig, ek deplizanplis dan bãnn instans formel.
Dayer, dan “Rencontres Créole des Seychelles” ki ti fer le 4-8 Mārs 2024, kot Lasanble Rezional Rodrig (RRA) inn gengn lasans pārtisipe, nou note avek boukou lantouziasm ki prosesis kreolizasion li enn fenomenn dinamik ki nou bizin aborde avek enn lapros pliridisipliner pou konsiderasion tou laspe ki tous nou kiltir kreol ikonpri nou lalang Kreol.
Avek piblikasion Diksioner Kreol Rodrige (ki rezilta enn pārtenārya ant RRA ek UoM), , dokiman ‘Regleman ek Konvansion pou lekritir Kreol Rodrige’, lansegnman KR dan lekol ek sa de nouvo Kour Kreol Rodrige la, enan enn konsiderasion ofisiel nou lang. Li dõnn ousi enn dimansion etnografik ek lingwistik lor plizir eleman nou kiltir kreol, kouman nou Sega Tanbour ki sante an Kreol ek ki zordi rekonet kouman enn Patrimwãnn Imateryel Kiltirel pou Limanite pār l’UNESCO.
Nou lang Kreol Rodrige li inpringnin dan nou ADN, li fer pārti integral nou ‘l’âme Rodriguaise’, tou saki fer nou enn Rodrige.
***
“Enn metriz lektir ek lekritir nou prop lang maternel” (Mary-Ann Augustin, Metres-lekol) 
De kour KR kot mo inn pārtisipe inn permet mwan konpran listwār ek levolision nou lalang ek ousi dekouver dokiman ‘Regleman ek Konvansion’ ki enn zouti neseser pou laprantisaz KR.
Kour konpleman Administrasion ek Kominikasion inn permet mwan realize antan ki Metres-lekol, ki KR li pa zis servi kouman enn zouti pedagozik avek bãnn zanfan dan lansegnman me li ousi enn zouti administratif ek enn mwayin kominikasion. Laprantisaz KR li favoriz enn vre inklizion; zordi apre mo formasion, mo enan plis konesans ek lasirans pou akonpagn bãnn profeser, bãnn zelev ek bãnn paran.
Mo pārtisipasion inn enn zoli lexperyans kot mo inn sirtou apresie rises nou lalang maternel. Mo swete ki dan lavenir enan pli boukou Rodrige ki kapav metriz lekritir so lalang maternel.
***
“Mo ankouraz tou Rodrige pou aprãnn lir ek ekrir KR” (Stephanie Meunier, Responsab Prodiksion, MBC Rodrigues) 
Li bien inportan ki nou kõnn nou kiltir ek nou afirm nou lidantite pou nou resi avanse. Sa formasion-la pe permet mwan plis konpran kouman ekrir ek lir Kreol Rodrige dapre so grafi ofisiel. Mo remersi bãnn lotorite ek UoM pou loportinite ki inn dõnn mwan pou aprãnn mo lang ek rekonekte avek mo rasinn.
Malgre li enn lang ki kapav paret ase konplex pou ekrir dan koumansman, mo inn dekouver so bote. Mo fier mo pe aprãnn larises ek itilite mo lang maternel atraver bãnn militan kiltirel ki mo inn kotwaye dan sa kour-la.
Realizasion Diksioner Kreol Rodrige li enn gran pa, pou rekonesans ofisiel evolision nou lang ek so aksesibilite. Onivo prodiksion dan ‘MBC Rodrigues’, nou pe fer pli boukou program an Kreol. Zordi, mo inn gengn bãnn zouti ki neseser pou ekrir ek koz nou lalang kouman bizin.
Onivo profesionel sa kour-la pou servi mwan pou enan plis proximite avek popilasion pārski aster, linformasion pou enan ousi enn dimansion pedagozik. Mo ankouraz tou Rodrige pou aprãnn lir ek ekrir KR. Se enn fierte pou tou Rodrige.
***
“Favoriz enn lanvirõnnman travay inklizif ek pli ris” (Luiciano Fils Roussety, Cameraman MBC Rodrigues) 
Dan enn lemond ki ape evolie kontinielman, li inportan ki sak dimounn li konsian linportans diversite lingwistik sirtou dan domenn profesionel. Resaman, mo inn gengn lokazion pārtisip dan kour kreol pou aprãnn bãnn baz kouman ekrir ek lir Kreol Rodrige, me ousi dan Kour Konpleman Administrasion ek Kominikasion.
Sa lexperyans-la inn elārzi mo bãnn konpetans ek inn ousi dõnn mwan bãnn konesans inestimab lor bãnn sibtilite kiltirel nou sosiete.
Antan ki cameraman ki travay pou ‘MBC Rodrigues’, itilizasion KR standārdize li enn zouti inportan pou kominikasion ek interaksion avek diferan piblik. Gras-a sa kour-la, mo kapav amelior pa zis kominikasion dan mo lorganizasion me ousi favoriz enn lanvirõnnman travay inklizif ek pli ris, kiltirelman pārlan.
Laprantisaz KR favoriz enn santiman lapārtenans ek respe pou nou kiltir. Rekonesans ek integrasion nou lalang maternel dan nou travay ek dan nou lavi toulezour, li ed nou pou ranforsi bãnn lien avek nou kominote.
***
“Enn privilez pou mo dir ki mo kõnn lir ek ekrir mo lang maternel” (Anne Carole Speville, Stazier, Komision Ār ek Kiltir, RRA) 
Mo pārtisipasion dan Kour Kreol Rodrige, inn fer mwan tonb plis amoure ek mo langaz kreol. Li enn privilez pou mo dir ki mo kõnn lir ek ekrir mo lang maternel. Mo konesans bãnn baz KR li enn lavantaz dan mo travay, me kour fondasion inn permet mwan aprofondir mo konesans lor listwār lalang kreol ek dekouver laspe siantifik ki enan dan konseptializasion Diksioner Kreol Rodrige.
Antan ki enn stazier dan Komision Ār ek Kiltir, swiv Kour Konpleman 
Administrasion ek Kominikasion, li benefik pārski aster mo pli fasil ekrir bãnn text kreol dan lortograf ofisiel, sirtou bãnn kominike an KR.
Sa kour-la, inn fer mwan realize ki li pa touzour sinp pou ekrir enn dokiman ofisiel an Kreol sirtou pār rapor ek bãnn term teknik. Me mo konfian ki avek pasians ek perseverans, pou kapav kreoliz boukou dokiman ofisiel dan Rodrig.
Mo remersie Komision Ār ek Kiltir ek Liniversite Moris pou sa zoli linisiativ-la, bãnn ‘tutor’ ki inn akonpagn bãnn pārtisipan ek inn fer sa kour-la enn sikse. Asterla, mo devwār antan ki zenn, se pārtaz mo konesans ek fer tou dimounn realiz larises nou lang Kreol Rodrige. 