Prof. (Dr) Arnaud Carpooran, OSK
Personal Chair, French and Creole Studies
Pou so 161em edision ek premie nimero 2025, AKP pe abord enn kestion ki pe fatig latet plizier santenn ansegnan dan primer, segonder ek tersier, plizier milie zelev ek etidian primer, segonder ek tersier ek plizier dizenn milie paran ek sitwayin morisien, ki konserne direkteman ou ki santi konserne mem indirekteman, par lansegnman Kreol dan kolez ek sirtou so introdiksion dan HSC.
•2024: enn premie zenerasion ki finn deza sakrifie
Deba-la finn fer boukou tapaz an 2023 ek an 2024 kan finn koumans gagn enn premie zenerasion zelev ki finn pran KM kouma enn opsion dan lexame SC, e ki, san okenn explikasion ki tini larout (parski onivo teknik tou bann zafer ti paret finn fini pre; get pli lwin), desizion ti pran pou pa met li dan HSC. Enn desizion san konsiltasion ki finn deza prodir enn premie zenerasion sakrifie. Kestion ki boukou dimounn pe poze zordi, se: eski nou pe al ver enn deziem zenerasion sakrifie an 2025 (alor mem ki nonb zelev ki finn konpoz KM nivo SC, li boukou pli gran ki nonb zelev lane presedan) ou alor nou pe al ver enn sime kot pou sey trouv enn solision kot bann zelev ki finn swazir filier KM pa santi zot pini?.
•Enn santiman lespwar…
Nou bizin dir ki enn santiman lespwar ti finn kree depi ki nouvo Minis Ledikasion finn pran fonksion, avek enn lapros “lame ouver” ek enn lespri konsiltasion ki finn prozet enn bon limaz lor so stil ek so filozofi ledikasion. Enn santiman lespwar ki ti ranforse dayer depi konferans ki li finn ena avek lapres le 23 Desam 2024, e kot li ti anonse ki dosie KM dan HSC lor so azinda, e ki li pou ena bann konsiltasion avek bann “exper” ki finn travay lor dosie KM dan HSC, avan pran enn desizion lor sa size-la.
•Enn lespwar ki finn deza tom dan dilo?
Selman, nou bizin dir ousi ki nou finn gagn plizier dizenn apel depi Samdi 11 Zanvie, kan bann dimounn finn pran konesans interview ki Minis finn donn Le Mauricien (11 Zanvie, pp. 10-11), kot, enn moman, li paret pe dir ki pa pou kapav ofer KM dan HSC an 2025, e ki sa desizion-la baze lor 3 rezon-la: “Il y a un problème de ressources humaines, de curriculum et de matériel”.
Kestion ki bann paran, profeser ek sirtou zelev pe poze, se eski finn deza ena rankont avek bann “exper”, e si wi, eski se sa bann exper-la ki finn donn Minis sa bann linformasion-la. Kestion-la paret bien pertinan, parski, zot rapel nou, avek rezon, ki se zisteman lekontrer ki finn paret dan lapres pandan lane 2023 ek 2024.
•Enn seri renion an 2022 ek 2023 ek plizier dokiman deza pre
Zot rapel nou touzour, avek rezon, ki linformasion ti finn deza sirkile dan lapres, an 2023, ek ousi pandan konferans Festival Kiltir ek Langaz Kreol 2023, ki plizier renion travay ti finn deza ena lie ant 2022 ek 2023 ant bann lecturer Departman Kreol depi MIE, bann teknisien Minister Ledikasion, MES, UoM ek SeDEC, e ki zot finn deza abat enn gro travay lor tou bann laspe ki konsern curriculum pou KM dan Grade 12 ek 13, ki li kom matier sibsidier (advance subsidiary) ouswa ek matier prinsipal (Main). Parmi bann dokiman ki finn deza finalize par MIE, ena: National Curriculum Framework Grade 10-13, Teaching and Learning Syllabus Grade 10-13 ek Maniel Grade 12-13.
Zot finn rapel nou anfin, touzour avek rezon, ki selon bann linformasion ki ti sirkile an 2023, zot finn konpran ki Minister ti organiz plizier renion pandan sa mem peryod-la, an prezans bann responsab ek reprezantan MIE, bann responsab AKRM, reprezantan UoM, etc., pou finaliz tou bann laspe ki ti res pou finalize: curriculum, materyel, “human resource”, labours Leta, Lorea, etc.
•Diskriminasion flagran ek violasion drwa zanfan
Santiman zeneral ki degaze parmi boukou dimounn ki santi zot konserne par destin KM dan kolez ek par drwa bann zanfan ki finn opte pou KM kom matier, seki malgre tou sa gro travay ki finn fer la, nou finn retrouv nou dan enn sitision kot olie pe rekonpans zelev ki finn pran pou premie fwa enn size istorik seki reprezant enn fierte pou nou pei, nou finn trouv nou devan enn premie zenerasion zanfan sakrifie. Boukou responsab ledikasion, ansegnan, paran ek piblik an zenaral pa finn ezite dayer pou konsider sa kouma enn diskriminasion flagran ek enn violasion drwa bann zanfan konserne.
***
•Enn apel ki adrese ek nou bann dirizan e ki oriante ver respe drwa zanfan ek responsabilite Leta Morisien devan listwar
Se pou tou sa rezon-la, ki mo pe permet mwa, antan ki enn parmi bann dimounn ver lekel bann zelev KM ek zot paran pe tourn zot aktielman pou gagn inpe lekleraz, mo pe permet mwa lans enn lapel isi, ek sertin nou bann dirizan, avek tou respe ek imilite ki mo stati inpoz lor mwa par rapor ek zot, pou ki zot donn sa dosie-la, linportans ek lirzans ki li merite, dan nouvo plan edikatif ki nouvo Gouvernman pe met anplas.
@ Apel dirize ver nou aktiel PM, Navin Ramgoolam, ki ti egalman PM kan KM ti rant dan lekol an 2012
M. Premie Minis, se sou ou manda kom Premie Minis, ant 2010 ek 2014, ki KM finn konn, lor enn vites akselere, so bann pli gran devlopman ziska ler. Finn ena dabor an 2010, kreasion Akademi Kreol Morisien (AKM)ki finn swiv par ofisializasion ek lansman Rapor Lortograf Kreol Morisien an 2011. Me finn ena sirtou introdiksion KM dan bann lekol primer Repiblik Moris apartir Zanvie 2012. Sa dernie evennman-la finn non selman permet koriz enn anomali konsernan absans prinsipal lang nou pei dan cursus skoler, me li finn sirtou koumans met enn frin ek enn diskriminasion ek enn inzistis orib ki ti pe afekte preske 1/4 nou popilasion zelev pandan enn tro long peryod.
@ Apel dirize ver nou aktiel DPM, Paul Bérenger, ki finn pran bann premie inisativ antan ki PM an 2004, konsernan introdiksion evantiel KM dan lekol
M Paul Bérenger, se sou ou manda antan ki PM an 2004, ek sou ou linisiativ dayer, ki finn ena pou premie fwa enn Komite Teknik ki ti zet baz pou ki ki ena enn premie travay armonizasion grafik pou KM. Se sa koumansman inisiativ premie ministeryel la ki finn debous lor kreasion Komite Teknik lor armonizasion grafik ek par laswit lor piblikasion Rapor Grafi-Larmoni an Septam 2004, e se sa ki pou ouver sime pou proze Diksioner Morisien (onivo UoM) ek proze Prevok-BEK (onivo Ledikasion katolik), e ki finn permet trouv enn lortograf ofisiel an 2011; seki dan so tour finn permet introdiksion KM dan lekol. Nou kont lor ou donn koudme konplet sa travay ki ou finn koumanse an 2004 la.
@ Nou aktiel Minis ki okip Drwa Zanfan, Arianne Navarre-Marie, ki ti defann drwa bann zelev KM kan li ti depite lopozision
Mm. Arianne Navarre-Marie, dan Parlman, ou finn pozisionn ou kouma prinsipal defanser drwa bann zanfan ki ti opte pou KM dan lexame HSC an 2023, e ki par larbitrer enn desizion inilateral, pa finn gagn drwa fer li sa lane-la. Se dayer ou kestion parlmanter ki finn obliz ansien Minis Ledikasion vinn presiz pozision ansien gouvernman lor la. Nou kont lor ou soutien ousi.
@ Nou aktiel Minis Ledikasion, Mahend Gungapersad, ki detenir lakle pou amenn inpe sourir lor figir plizier zenerasion zelev nou Repiblik
M. Mahend Gungapersad, nou pena okenn dout lor ou bonn volonte pou amenn dosie KM dan HSC an-avan dan destinasion ki li bizin. Selman, nou ti pou swete ki ou aksepte zwenn bann dimounn ki finn vremem travay lor sa dosie-la ziska ler, desort ki nou kapav ariv, pli vit posib, lor enn desizion konsansiel lor meyer fason pou fer li avanse ek evit kree bann lezot zenerasion sakrifie.
Avek tou mo respe.