Dr Jimmy Harmon
UNESCO pou Zourne Internasional bann ansegnan sa lane-la finn swazir kom tem : valoriz bann lavwa profeser: ver enn nouvo kontra sosial pou ledikasion (Valuing teacher voices: Towards a new social contract for education).” UNESCO dimann ki bizin donn bann ansegnan enn rol kle dan fason ki nou fasonn ledikasion pou lavenir. Li dimann ki bizin fer rant perspektiv bann ansegnan dan politik ledikasion pou ki li debous lor enn nouvo kontra sosial.
Lavwa
Ninport ki reform edikatif ou pli bon kurikulum ki nou kapav ena, se ansegnan ki dan klas ki kapav dir si aprantisaz pe marse ou pa. Kouma nou dir, finalite se eski ‘teaching/learning is taking place’. Me sa ki nou apel ‘teaching’ (ansegne, montre) li na pa enn lalis guidelines/instructions ki ansegnan-la bizin ekzekite. Ansegne li enn lar an limem, nou dir an angle ki ansegne se enn ‘craft’. Sa mo ‘craft’-la li interesan parski li evok limaz ki nou servi bann materyo ek avek sa materyo-la nou prodir kitsoz extraordiner. Sak ‘craftsman/craftswoman’ pe kapav servi mem materyo me zot prodwi final pou touzour diferan. Se samem kifer partikilarite travay ansegnan. Sak ansegnan li kree so prop mod-danplwa ek so prezans pandan ki li pe deplway so mod-danplwa determin tou. Prezans enn ansegnan fer a traver so lavwa. Lavwa enn ansegnan dan klas dir so lidantite. Li exprim so singilarite. Se koumsa ki lavwa, lar oratwar finn enn eleman inportan dan transmision tou ansegnman dan listwar limanite. Mem si zordi rol enn ansegnan li plis enn animater, enn fasilitater, enn kikenn ki kree kiryozite dan so bann aprenan, plis ki enn kikenn ki pe fer enn kour mazistral, li res kan mem enn kikenn ki so lavwa enn zouti an or. Lavwa li na pa zis kord vokal. Li sirtou exprim saki dimounn-la resanti, ki manyer li pe anvi exprim li dan enn sitiasion. Kan nou ariv onivo politik ledikasion li alor inportan ki tou ansegnan kapav fer tann so lavwa. So lavwa azout avek lezot vinn enn lavwa miltip, plirivokal.
Lavwa ena valer. Tou sistem ledikasion bizin valoriz lavwa tou dimounn. Pou ariv a sa, li inportan devlop enn kiltir fer tann lavwa dimounn. Se enn kiltir demokratik ki nou bizin vize. John Dewey (1859-1952) ki enn gran teorisien ledikasion ti touzour asosie ledikasion avek demokrasi. Li ti limem enn kikenn bien angaze dan sosiete. Li ti dan biro ekzekitif NACCP (National Association for the Advancement of Colored) ki ti amen lalit pou drwa sivik bann Afro-Amerikin ek enn sosiet inkizif. Gouvernman aparteid sid afrik a lepok ti interdi so bann lide ek pilikasion. Kan nou get ledikasion dan so dimansion dimansion demokratik, se kapasite devlop lespri kritik. Dan so liv Democracy & Education (1916), John Dewey dir ‘Were all instructors to realize that the quality of mental process, not the production of correct answers, is the measure of educative growth’ ( p.30). Mem si enn bon repons inportan, me se pa zis ki nou zelev donn bon repons ki dir ki nou enn bon ansegnan. Me se sirtou koma nou zelev finn travay so lespri pou gagn bon repons. Donk pou John Dewey enn bon ansegnan se kiken ki fer zelev travay zot lespri.
Dan mem fason panse, ki manyer nou kapav fer valorizasion lavwa bann ansegnan ? Eski se zis fer zot koze ? Eski se zis invit dimounn-la dan enn seminar, ekout enn trale diskour avan avek so resitasion salitasion protokoler dan enn angle inpekab ? Eski se apre lerla ekout ansegnan ek fer sanblan pe pran kont so lide, so lavwa ? Ofet, fer tann lavwa li vremem enn lekzersis difisil, delika. Li dimann enn dispozision spesial pou enn lespri ki ouver, kapav ekoute. Li non selman enn defi pou selwi ki konvok renyon pou ekoute, me li osi angaz dimounn ki invite pou fer tann so lavwa. Dimounn ki konvoke li so kote bizin konsian so pozision ek so lotorite kan li pe konvok lot la. Saki pe partisip pou fer tann so lavwa, li bizin kone ki manyer li exprim li, ki manyer li fer tann so lavwa. Li enn lekzersis dialog. Vre dialog li deroule kan ena plizier lavwa ki kapav exprim zot dan enn kad etabli me samem kad bizin kapav evolie. Fode pa kad-la rizid. Li bizin bouze pandan ki dialog pe avanse. Se kapasite exprim so lavwa ek kapasite tann lavwa enn lot ki amenn nou konpran ki nou rod dir par « perspektiv ».
Perspektiv
Kan nou koz perspektiv enn dimounn ou enn group profesionel, nou rod dir manier ki zot get bann zafer. Enn perspektiv li pa donn nou tou laverite lor enn kitsoz. Me sak perspektiv anrisi nou konesans konpran enn zafer ek li permet nou trouv bann zafer dan so globalite, so profonder ek so konplexite. Sa lapel ki UNESCO lans nou dan domenn ledikasion pou integre perspektiv bann ansegnan dan politik ledikasion li vinn dir ki nou pa kapav fer enn pei so sistem ledikasion avanse san tenir kont manyer ki bann ansegnan get zot travay, zot mision opre bann zanfan. Se koumsa ki tou dimounn ki dan enn pozision responsabilite ek dan enn relasion yerarsik avek bann ansegnan, li inportan verifie lavwa ansegnan. Li ve pa dir ki lavwa-la pena fos not, ki li kapav pe tronp li me se dan enn akey ki nou fer sa lawva-la ki nou kapav avanse. Se komsa ki nou ouver simin pou enn nouvo kontra sosial. Pou UNESCO bann ansegnan reprezant bann akter prinsipal dan sa nouvo kontra sosial.
Nouvo Kontra Sosial
Sa koze Nouvo Kontra Sosial li vinn sirtou dan bann ledid internasional ki UNESCO ti fer dan kontex linpak COVID-19 ek ki manyer sa pandemi-la dimann ki nou reinvant lavenir lor baz enn nouvo kontra sosial. Nou retrouv bann refleksion lor sa size-la dan piblikasion ‘Re-imagining our futures together: a new social contract for education’ ( UNESCO, 2021). Dan sa piblikasion la, UNESCO dir ki Nouvo Kontra Sosial baze lor sertin prinsip. Premie prinsip se interkonektivite ek interdepandans ki bizin inflians pedagozi kot zelev, ansegnan konsian ki tou konesans na pa transmet ou frabrike san koneksion avek lezot. Klas dan enn lekol li pa enn lemond an limem. Me li enn lemond avek lezot. Deziem prinsip se koperasion ek kolaborasion. Ledikasion li bizin kapav konstrir kapasite bann individi pou travay ansam ek pou transform zot mem. Trwaziem prinsip se solidarite, konpasion, etik ek anpati bizin rant dan manyer ki nou aprann dan lavi. Bizin valoriz diversite ek pluralite. Ansegne bizin kapav abord bann prezize dan sosiete. Bann ansegnan bizin partisip dan deba lor sosiete zot viv. Lerla bann ansegnan pou kapav pa zis transmet konesans me osi prodwir konesans lor sosiete. Katriem prinsip se ki tou sistem ledikasion ena enn ti evaliasion pou verifie si aprantisaz finn deroul bien ou pa. Me sa sistem evaliasion-la bizin konsian ki mazorite kitsoz ki nou aprann dan lekol ek dan lavi li na pa mezirab. Sinkiem prinsip, lekol bizin enn plas proteze ki donn bann zelev posibilite pou konfront bann defi ek posibilte ki zot na pa pou kapav gagne ayer ki zis dan lekol. Tou bann nouvo teknolozi, emerzans Intelizans Artifisiel (IA) bizin vinn enn soutien pou lekol me na pa ranplas lekol. Lor mem prinsip, tou gouvernman so rol se donn soutien finansie, veye ki bann norm ek standard dan ledikasion li ekitab ek amenn epanwisman drwa imin.
Ala enn de ti refleskion pou sa 5 Oktob 2024. Bonn fet tou bann ansegnan !
Dr Jimmy Harmon